15:21 13 июня 2022 г.
Кӑҫал Чӑваш Енре – Мухтавлӑ ентешсен ҫулталӑкӗ. Ҫавна май Кивĕ Эйпеҫре ҫак шкултан тухнӑ тӑрӑшуллӑ та паллӑ ҫынсене чысларӗҫ. Савӑнӑҫлӑ тӗл пулӑва Аслă Пăла Тимеш ял поселенийĕн пуҫлăхĕ Юрий Алексеев, «Комбайн» ял хуҫалăх производство кооперативĕн ертÿҫи Гурий Федоров, Лащ-Таяпари Таса Турă амăш чиркĕвĕн настоятелĕ иеромонах Силуан, Осипова Галина хутшăнчĕҫ.
Кивĕ Эйпеҫ шкулĕ чылай ӗҫчен те пултаруллӑ ҫынна парнеленӗ. Вӗсем район, республика тата ҫӗршыв аталанӑвне хӑйсен тӳпине хывнӑ. Кивĕ Эйпеҫ шкулĕнчен паллă спортсменсем, журналистсем, çĕр ĕçченĕсем, художниксем, çар çыннисем, патшалăх тата общество деятелĕсем, наука еҫченĕсем тухнă. Ку тӑрӑхри Социализмла ӗҫ геройӗ Николай Иванович Панкратов, Раҫҫей Федерациĕн тата Чăваш Республикин тава тивеҫлĕ ял хуҫалăх ĕҫченĕсем Гурий Федоров, Владимир Анисимов, Раҫҫей Федерациĕн тата Чăваш Республикин тава тивеҫлĕ культура ĕҫченĕ Татьяна Шаркова, Чăваш Республикин тава тивеҫлĕ ытти отрасльти ĕҫченĕсем, тĕрлĕ наука кандидачĕсем пурӑнакансемшӗн яланах тӗслӗх вырӑнӗнче. Вӗсен тухса калаҫни кашнинех кӑсӑклӑ пулчӗҫ. Уява шкул ачисем юрлани, ташлани, учительсен коллективĕн, шкул выпускницин Вера Панкратован юррисем илем кÿчĕҫ.
Кивӗэйпеҫсем хӑйсен тӑрӑхӗнчен тухнӑ пултаруллӑ, тӑрӑшуллӑ ентешӗсене хисеплеҫҫӗ, вӗсемпе мӑнаҫланаҫҫӗ.
СХПК “Комбайн” Яльчикского района